لعلّـــــي أصلّـــــي

يارَبِّ هبْ لِي ..

مِنَ النّاسِ نفَراً .. 

يُرِيدونَ وصْلِي ..

ليسَ لِماليْ .. ليسَ لِجاهيْ ..

وليسِ لأصْلِي ..

ولكِنْ .. لأجلِي ..

يُريدونَ فوزِي ..

بأنْ ألتقيكُم ..

فلُقياكُمو هي ذِكرِي وشُغْلِي ..

وإنْ تَقْطعُونِي ..

فويحِي .. وذُلِّي ..

فقطْعُكمو هُوَ حُكْمُ بِقتْلي ..

خُذوا نومَ عيْنِي .. وفِكْري .. وكُلِّي ..

ولا تحْرِموني ذِكْرَ حبيبي ..

فهو طريقُ النّجاةِ .. لِمثْلي ..

وتُوبوا عَليَّ ....

لعلِّي أُصَلِّي .

الكلام إنتهى

نفسي أطلع للنجوم .. وأغشى الكواكب كُلّها ..

ويدّي اليمين تمسح دموع الناس .. تبدّد حزنها ..

واتمنّى بي يدّي الشمال .. أدُك حصون الظالمين وأهدّها ..

واشيل الفرح .. واهديهو لي من إتجرح .. والناقصة دايماً أتمّها ..

لكن بلاك .. كُلّ المُنى .. تصبح كلام .. ما إنتهى ..

إنتي اليمين .. وانتي الشمال .. وياكي الشّمِس في ضيّها ..

أنتي السّبب .. وبطُل العجب .. في زولة يندر مِتلها ..

أكتب شنو .. وأقول فيك شنو .. وفيكي الشّعر جد إنتهي ..

إن قلت أكتب فيك كلام .. ما حيفهمهو أُولي النُّهى ..

فخلّيت مخاليق ربّنا .. تشرح مشاعري .. وسرّها ..

تلقِي الشّمس .. تلفح وجوه الناس .. تساسِق ضُلها ..

والقمرة تكسو النّيل دُرر .. تسقيهو بحري .. وأهلها ..

وتصدح طيور بي إسمها .. وتميل زهور .. لو مرّة غابت عنّها ..

وضحكة حبيباتنا البنات .. بالدنيا عندي .. ومُلكها ..

يا إنتي .. يا أنا .. يا مها ... نُذوري ليكي كتبتها ..

أغشى الكواكب كُلّها .. واجيب ليكي تذكار منّها ..

ولا كلمــــة

-         سامعاني ؟

-         أسمع كيف ! .. وكلامك كُلّو في سرّك !

-         وكيف ردّيتي ! .. ورّيني !

-         أظِنْ .. وللّا خلّيني .. يمكن ردّي ما يسرّك

-         كدي حاولي معاي

-         بسمع فيكَ ليّ زمنْ .. بس لو عبّرت ما بضُرّك

-         أعبّر ؟

-         شكلي زعّلتك !

-         لا مافي زعل .. أزعل منّي !

-         طيّب قول .. طمّني !

-         ظنّاً زي ده آخر مرّة حتظنّي

-         خير يا سِيدي .. سيبك منّي .. قول لي كيف بتسمعني !

-         جاوبتِكْ

-         كيف يعني !

-         صوتِك جاي من جوّاي .. زي ما صوتي جاي مِنّك ..

بشوفا حروفي في عيونك .. وحروفك عايشه في عيوني

-         لكن إنتَ حارمني .. كلامك هو البريّحني

-         ورّيـــتِكْ .. يمكن يوم حافهم حاجة من لغتِكْ ..

و لسانك يوم حينطق كلمة سوداني

-         ولا يهمّك .. إنتَ فاهِمني؟

-         أكيد طبعاً .. وهو ده زااااااااااااتو المحيّرني !!!

 

إهــــــــــــــــــــــــــداء خاص لصديق .

عشان أعجِبْ

عشان أعجِبْ .. وعشان أغلِبْ ..

وعشان أكسبْ .. واخلّي النّاس علي تِنْكبْ

-

والِمّ المال .. واعدْلَ الحال ..

وشِيتاً دايرو ما بَغْلَبْ

-

أخلّي النوكيا والسامسونج ..

أجيب آي فون .. واقول "مرحبْ"

-

والبس بدلة .. بي كرفتّة ..

والقمصان مفصّلة من ميلانو .. طلبْ

-

والبس جزمة إيطالية ..

أسيب نعلاتي .. والشبشبْ

-

وبيت حدّادي مدّادي ..

في حويشو الخيول تتعبْ

-

واقرّش خمسة عربيّــــــــات ..

واسوق إنفينــــيتي ..

 والطيّـــــارة في المُركبْ

-

واسافر من بلاد لي بلاد ..

أشوف الدُّنيا .. واتعجّبْ

-

تصبح بيّ في طوكيو ..

وتمغرب بيّ في المغربْ

-

ولو الناس قالوا نمشي شرِق ..

أقول لا لا لا .. نمشي غرِبْ

-

وأتشرّط .. وأتحجّجْ ..

واتعلّلْ .. وأتسبّبْ

-

قال "بي قروشنا بِحترمونا" ..

بتاع الركشة ما كضّبْ

-

وحاة النِّعمة يالزينين ..

أتوّركم من النّباه .. وانوّمكم من المغربْ

-

عشان تعجِبْ ! .. عشان تغلِبْ ! ..

عشان تكسبْ ! .. ولي غير الله تتقرّبْ !

-

سِواةً زي سِواتك دي ..

تخلّي الكافر يتعجّبْ !

-

صلّي على الرسول يا خوي ..

يبقى ليكَ نورْ .. ودرِب

-

صلّي على الرّسول .. واطلُبْ ..

عليك خير الله ينْصَبْ .. صَبْ

-

وقليبك يبقى مليان حُبْ ..

والمكتوبة ليك .. بتجيك ..

وكلّو مُسطّر .. ومُرتّبْ

-

إنت بس العليك سوّيهو ..

وبِرْ والــــــــــــــديــــــــك ..

وقول يــــــــــــــــــــــا ربْ .