من نظره بسْ

يا قلبي .. حِسْ ..

ما خوفي منَّك ..

خوفي ليك يوم تنتكِسْ ..

وترجع تقول ..يا ريتو كان ..

ما تُهتَ في عيونو الحُنان ..

وودّيت رجولي علي الحرسْ ..

وهو عيونو مليانات حرسْ ..

حواجبو مرسومات مقاس ..

ودي خِلقة الله .. من الأساس ..

أمَّا الرموش .. دي براااااااها كوم ..

بيناتا .. تفكيري التبسْ ..

حارسات عُيون؟ .. حارسات دُررْ؟ ..

أهو ده البقولوا علي السِّحر؟؟؟ ..

أسر القِليب .. وسبى النّظر ..

والله .. جد ..

ما شُفت مِتلو علي البشر ..

يا قلبي ..هُس ..

وبالراحه .. روق ..

فاضحاني دقّــاتك .. عديل ..

لا الّليله .. لا مِن يوم أمِسْ ..

كشفوك .. وسمعوك ناس كِده ..

ده من نظره بسْ؟ ..

تُهتَ .. وبِقيت سارِح براكْ ..

ومشيت .. وخلّيتني بوراكْ ..

لي زول .. مُناكَ يكون معاكْ ..

وانا قلت ليك ما بمنعكْ ..

بس خوفي .. كان راجلاً كلسْ ..

ما بمنعك .. حِبْ .. واشتهي ..

ده العُمرِ يومين .. وينتهي ..

يللاكَ .. نمشي ليها هي ..

ومصيرنا نوعاهو الدرِسْ ..

والكاتبو لينا المولى .. خير ..

أقلّو .. يرتاح الضمير ..

ولو ما قِسمتك .. أو كان في .. غير!

ما تجِيني .. داقِّي لي جــ ..

حق .. مشــــروع

أسيبُو ؟ .. بعد أسرني هواهُو ؟ ..

كيفِن أسيبو ؟ .. وامشي لمين ؟ .

حبيبي .. منايا .. يوم ألقاهو ..

حالف .. أهدي ليو .. ياسمين .

ورِد أبيض .. نبيل معناهو ..

يفوح بشذاهو .. للباقين .

يصون لي حبَّنا .. ويرعاهو ..

خلِّيكم كمان .. شاهدين .

سِمِعتو ؟ .. قِليبي بالتحرير ..

ينادي .. وليهو صوت مسموع .

أرحل .. يا ظلام الخوف ..

ده في وشَّ الكتاب .. مطبوع .

" أنا ما أجرمتَ .. يوم حبّيتو ..

ولي .. في حُبِّي .. حق مشروع ".

وبكره النور .. حيمحي ظلام ..

بكره بضوِّي حُبِّي .. شموع .

نويت .. والنيّه زاملة سيدا ..

أقول للناس .. حبيبي يعيش .

واخلي القالوا ليَّ .. حبيبك ..

كِذبه .. يقولــوا لي .. معليش .

وأكِّد ليهم .. إنُّــــو حقيقه ..

بس .. ماف داعي للتفتيش .

ومش لو جابوا لي بوليس ..

ما بسيب حُبِّي .. لو جا الـ ...

حتَّى تستريح قلوبكم

صلّوا على خيرِ الأنامِ مُحمَّدٍ ..

صلّوا عليهِ .. وسلّمُوا تسْليما .

يا خَير مَنْ أُرسِلتَ فينا هادياً ..

ومعلّماً .. ومبشّراً .. وحكيما .

المرءُ مع مَنْ يحبُّ مُرافقٌ ..

وأنا أحبّكَ .. قُلتها تقديما .

ثبِّت خُطانا في الصِّراط فإنّهُ ..

يا ربُّ يأبى أنْ نذوقَ جحِيما .

فهو الطّريقُ لأمّةِ الإسلامِ .. بلْ ..

هو بالشفاعةِ للعبادِ كريما .

يا ربِّ ألحقنا بِهِ .. وبِصَحْبهِ ..

روضُ الجنانِ .. لكي ننالَ نعيما .

صلُّوا عليهِ .. فتستريحَ قُلوبكُم ..

لا قلبَ ..في حبِّ الرسولِ سقيما .

صلّى عليكَ الله .. يا عَلمَ الهدى ..

ما دامتِ الدُّنيا .. ودُمتَ مُقيما .

قال رسول الله (صلّى الله عليه وسلَّم): (مَا مِنْ أَحَد يُسَلِّم عَلَيَّ إِلَّا رَدَّ اللَّه عَلَيَّ رُوحِي حَتَّى أَرُدّ عَلَيْهِ السَّلَام ) ‏

يكون في عِلمِك

كل ما أقول أجيكي واصارحِكْ ..

ألقى قليبي مِنِّك هابْ .

وأكتر حاجه شاغله البال ..

وعامل ليها ألف حسابْ .

إنِّي أجيكي .. مالي مكانتي ..

أقيف في زُمرة الخُطّابْ .

وأتحدّى البقولو ليكي ..

في عينيكي .. شافوا عُجابْ .

أنا في عينيكي بس .. يا السمحهْ ..

ما بيكفيني أملا كتابْ .

يكون في عِلمِك .. إنّو هواكي ..

ما خبّط عليّ البابْ .

ولا أخد الإذن مِن قلبي ..

لا علّل كمان أسبابْ .

حقيقه .. بقولا ليك .. يا السمحهْ ..

خايف حِلمي يبقى سرابْ .

وانا الما خُفتَ يوم في حياتي ..

إلا مِن الهوى الغلاّبْ .