يا دنيا .. مافيكي إلا أنا

يا دنيا .. مافيك زول صبر ..

في ريدو زي شخصي الضعيف ..

قلّبتي قلبي علي الجمر ..

وجراحي ماليها النزيف ..

وكحّلتي عيني بالسهر ..

ودمعي ما داير يقيف ..

وشيّلتي راسي الهم .. جبُر ..

ومنّي .. شلتيهو الوليف ..

يا دنيا .. مافيك إلا ده؟ ..

حارماني منّو .. بلا سبب؟..

ده حبيبي .. واكتر من كده ..

هو الشاغل البال والقلب ..

سايقاهو ريدي معانده ..

وانا برضو .. سايق في الدرب ..

بس أخديها منّي مؤكّده ..

ما قصدي أرمي عليك عتب ..

يا دنيا .. مافيك إلا انا؟ ..

ورّيني بس .. لمتين تدوم ..

حالة التباريح .. والعنا ..

عشان أبقى جاهز .. لقدوم ..

حبيبي .. ويرجع لي هنا ..

ونعيش هناك .. وسط النجوم ..

ويا دنيا .. سيبِك مننا ..

ده أصلو حالِك .. ما بيدوم.

إعتذار

حأقيف من الكتابه لمدة أسبوع..نسبةً لظروف قاهره..وأنا بعتذر ليكم

البحبّك ما أناني ..

وليك على غلطو بيعاني

المسامح ما بيحسب ..

مرّه أولى .. ومرّه تاني

أبقى أكبر من عنادك ..

وأبقى لحبيبك أماني

,,,,,,

البحبّك ما بينكر ..

الغلط بان في عينيهو

كل شي مكتوب .. مسطّر ..

والغلط ما سعينا ليهو

ده القدر لابد حيحصل ..

مهما نتحايل عليهو

,,,,,,

البحبّك جازى روحو ..

بعنادك .. والعتاب

وانت ما قصّرت برضك ..

بالبعاد .. والإغتراب

أمسح الكاتمو في قليبك ..

وشيلو من وسط العذاب.

,,,,,,

البحبّك .. أجبروهو ..

ومسكوا من إيدو البتوجعو

ونفسو يشرح أيّ حاجه ..

بس كرامتو تقيف .. وتمنعو

ده القلب ليك بينادي ..

سامحو مرّه .. وأبقى أسمعو.

وقالوا : المسامح كريم.

لسّه بدري

في طريقه إنو الإنسان يحلم كل يوم .. نفس الحلم؟؟؟؟؟؟.... نفسي أعرف كيف

ما لسّه بدري على الوداع!..

ده حتّى ما وريتيني إسمك

دايره تمشي ..وسبتي طيفِك..

يشيل ويوصف ليَّ رسمك

جيتيني في أحلامي صدفه..

وحسّيت بأنِك ما غريبه

وفتحت ليك قلبي اللي كان..

شايف أمور الحب .. عجيبه

طمنّت قلبي وقلت أدخل..

في نعيم الحب .. ونارو..

وكسر القلب قيد المشاعر..

وفتح الطريق ..بالريد أنارو

وفجأه .. قلتي ليّ ماشه..

وسايقه قلبي معاك أسير

وأنا بدعو الله .. البيّ عالِم

يطول منامي .. لو ما بيضير

ولسّه برضو مصِّره تمشي؟..

أقلّو خلّي معاي قلبي

تغيبي وتجي.. وتلقيهو حافظ..

ليك مشاعري .. وكل حبّي.

وعلى قولك يا حوته : يوم يزور طيفك خيالي ..