الحاسّه السابعه

يا حبيبي ريِّح بالــك ..
ما بهـوى غيـرك إنتَ
وما لي سواك .. وحياتك ..
وعمرك علي ماهُنت
روِّق .. وكيد عزّالك ..
حاسبين عليك الحـِّته
ما يمسكوك بسؤالك ..
كيفِن نسيتك .. وإمتى

ليلِي البشيلو طويل ..
وأنا لا شكيت لا تعبت
ونجومو ليكَ دليل ..
رسمت وجيهك إنتَ
والقمره نورا قـليل ..
بين السحاب تتغطّى
خجلانه منُّو عديل ..
من نور حبيبي الفلته

إحساسي بيك براهـو ..
غير الحواس .. الستّه
نِعمت حياتي معــاهو ..
ولي نعمة الله .. شكرتَ
حُسنك .. سحرني بهاهو ..
وفي حُسنك .. أنا إحترت
الغيرك .. أنا بأباهو ..
ولي غيرك .. أنا ما مِلت

خلِّــــــــــــي عنِّــــــــــك

خلِّـي عنِّــك .. يا مُنـايـا ..

أرمي هم ريدنا .. وأمورو

ده ربّنا البي حالنا عالِم ..

هو البِحدِّد ليو مصيرو

وبكره عِلم الغيب يبيِّن ..

ومافي شي بينصِفنا غيرو

وعمري بيكي زهورو تبسُم ..

وتبقِي لي عِطرو .. وعبيرو

,,,,,,

خلِّي عنِّك .. ليل سُهادِك ..

وسيبِي .. لِعيوني البِساهرو

وضوِّي بي عينيكِ درباً ..

يودِّي لي ريدنا .. ومشاعرو

ونمشي من ناساً .. بخادعوا ..

وفي طريق الحُب .. بتاجروا

ونهدي ناساً منٌّو ضاعوا ..

وننصح الناس . البِكابروا

،،،،،،

خلِّي عنِّك .. إنشغالِك ..

وقدِّري اللحظات .. معايا

ده الحنين الشايلو ليكي ..

بيحكوا بيهو الناس حَكايا

لو ما بخاف مِنِّك عِتاب ..

أنا كنت شِلتِك .. في الحنايا

وأبقي أعذري شوقي ليكي ..

وخلِّي بالِك .. يا مُنــايــــا .

بكره أحلى

لسّه .. ما فات الأوان ..

ده بكره حيجينا بجديدو

بكره حنلاقي الحنــان ..

ويجينا .. مادي لينا إيدو

ونمسح الماضي .. اللي كان ..

ونكتب البينّا .. ونعيدو

وينمو ريدنا مع الزمان ..

ونبقى شريانو .. ووريدو

،،،،،،

لسّه .. ما راحت علينا ..

لو النفس طالع ونازل

والدنيا إن جارت علينا ..

ده نحن في ريدنا بننازل

وبكره بي خيرو بيجينا ..

والفرح .. فينا بيغازل

ونسأل الله يديمو لينا ..

يكفّينا بس .. قول العوازل

،،،،،،

لسّه .. ما نسيناها كلمه ..

قلناها بي لغة العيــــون

ده المولى واضع فيها حِكمه ..

معـاها .. أحـزانّا بتهون

أوّلا ال(ح) .. وفيها ضمّه ..

وآخرا ال(ب) .. بالسكون

بكره .. بيها حياتنا تسمى ..

نعيشــا .. والكايـن .. ....

علي قولكم : بكره أحلى .

بالي مشغول بيها

طمّنوني علي حبيبي ..

أصلو طوّل في غيابو

ده شال معاهو كمان قليبي ..

ولامّي دمع العين سحابو

وزاد علي بالشوق لهيبي ..

وبالي مشغول بي مآبو

ياربّي تجعلو من نصيبي ..

وتحميهو .. ده الصاين شبابو

،،،،،،

لو في يوم لاقيتو صدفه ..

أدّوهو منّي سلام محنّه

وقولوا ليهو جراحي تشفى ..

لو مرّه بس .. يدّيني رنّه

ده غرامي بيهو .. الما بيخفى ..

شافوهو فيني .. وقالو جنّ

ده المافي بيني وبينو كُلفه ..

ده البعدو نار .. والقربو جنّه

،،،،،،

قولوا ليهو العيد غِشانا ..

وبكره يتلاقو الحبايب

وإنت برضك ما معانا ..

ولينا ضوقة المُرّه سايب

وأنا نفسي يتحقّق منانا ..

ولي .. قليبي الشلتو جايب

ياخي .. عجّل بي لقانا ..

وابقى أظهر .. ولينا جاوب

،،،،،،

ديل قالوا عنّك ما بتسأل ..

وانا قلت .. ما ظنّيت يكون

وده حبيبي أبداً ما بيزعل ..

إلا من ســوء الظنون

وماك عارف الريد بيعمل ..

ده فينــا .. إتفنّن فنون

وانا بكره صبري الفيني .. بكمل ..

واقول .. إتعزّز الليــــ ...

كلّ سنه طيبين ... مقدّماً.

انا يا قلبي .. ما لي غيرك

يا قلبي ..ما تريد من وراي

ورّيني تاني ..

قبل تريد

سايبني للأشواق ..بــــــراي

وانا ما حمِل ..

شوقي الشديد

..

ما مسامحك أنا ..يوم قلت لي

يللا نمشي ..

علي الحبيب

من ديكَ ..وانا حــــالتي العلي

ما بترضِي ..

لا عدو .. لا قريب

..

لاقيتو ..نسّاني الإسم

ده لو ماقلتو ..

بالمقلوب

صافحتو ..وانا خانّي الجسم

وبقيت ..

علي أمري مغلوب

..

بي عيونو ..ده منو الما سِمِع

الصادفِن ..

ياهو الغِرِق

والجيد تقول ..تمثـــــال شمِع

لا فيهو كسره ..

ولا عِرِق

..

ما ينفع أوصِف ..في حدود

إن دُرتَ ..

أوصف بسمتو

وعلى الورود ..الفي الخدود

سبحان ربِّي ..

وحكمتو

..

حبيبي هناك سمِع ..دقّاتك الولهانه

ووريتو إنّي عجول ..

ناقصاني طولة البال

وأنا برضو أستاهل ..كمان بأمانه

يوم باريتك إنتَ ..

وخليتني مكشوف حال

..

ورّيتني النجوم ..نصّ النهار يا قلبي

والنوم شلتو ..

من عينيّ عزّ الليل

وانا شوقي الشديد ..ما قدرت ليهو أخبّي

إنت مُصِر تظهّرو ..

وباقي ليهو دليل

..

وبيني وبين نفسي ..بدعو عليكَ الله

واقول في سرّي . شكراً ..

يا قلبي كتّر خيرك

وداير أشِقو صدري ..وأخليكَ تدّلى

واتراجع .. واضمّك ..

انا يا قلبي .. ما لي غيرك .

وعلي قولكم : ياقلبي ماك هيّن .

99199

ليه ماجيت يا حماده المدرسه ؟ ..

فايتاك حصّه عربي .. ودين ..

كل أصحابك بسألوا عنّك ..

وباقي المدرسه .. قلقانين ..

منى وإقبال جايين بوراي ..

وناس عبّودي حيجوا بعدين ..

مالك .. خير .. من شنو متضايق! ..

كنت كويس .. وحسّه حزين؟ ..

,,,,,,,,,,,,

أنا لي كم يوم .. قاعد أتألّم ..

زي ألمِك داك .. يا صابرين ..

ودّوني الدكتور .. أمبارح ..

وكشفوا علي مرّه .. وإتنين ..

وقالوا علاجك عندنا .. ســـاهل ..

بس الدوا والمستشفى .. الناقصين ..

ورجعنا البيت .. وأنا لسّه موجّع ..

دخلت .. لقيت الناس .. لامّين ..

شايف أختي هناك .. بتصلّي ..

وأخوي بيتلو في سورة ياسين ..

وجات جارتنا .. خالتي ماريّه ..

أم ناس مايكل .. وناس ياسمين ..

بإسم الرب .. قالت يا حماده ..

حتشفى .. وتبقى من السالمين ..

أنا خايف ما أمشي المدرسه ..

تاني .. وما أقدر ألعب بعدين ..

,,,,,,,,,,,,

ضحكت ..

ضحكت .. وبالضحكه حلاتك يا صابرين

وقالت ليهو .. ما نحن برانا ..

زيّنا في كتير في السودان ..

مرض لا خلّى كبير .. لا صغيّر ..

ده المرض الإسمو .. السرطان ..

وقالوا في ناس ملمومه عشانّا ..

حيتكاتفــــــوا .. قدر الإمكان ..

إيد على إيد .. حيكبّروا كومم ..

وإختاروا الأرقام دي .. العنوان .. (99199)

بيها حيبنوا عماره كبيـــــــــره ..

ونجي نتعالج .. بالمجّـــــــــان ..

وده العشم برضو .. يا بلد

دي قصه خياليه .. على لسان حال طفلين مصابين بالسرطان .. وأكيد في زيها قصص كتيره حقيقيه .. في مستشفى قيد الإنشاء .. إسمها 99199 .. وفي الناس الإتلمّوا عشان يبنوا المستشفى ده ..خلّيك واحد منهم

ممكن تدخل وتشارك .. من الصوره دي