الاثنين، 27 سبتمبر 2010

99199









ليه ماجيت يا حماده المدرسه ؟ ..

فايتاك حصّه عربي .. ودين ..


كل أصحابك بسألوا عنّك ..

وباقي المدرسه .. قلقانين ..


منى وإقبال جايين بوراي ..

وناس عبّودي حيجوا بعدين ..


مالك .. خير .. من شنو متضايق! ..

كنت كويس .. وحسّه حزين؟ ..

,,,,,,,,,,,,

أنا لي كم يوم .. قاعد أتألّم ..

زي ألمِك داك .. يا صابرين ..


ودّوني الدكتور .. أمبارح ..

وكشفوا علي مرّه .. وإتنين ..


وقالوا علاجك عندنا .. ســـاهل ..

بس الدوا والمستشفى .. الناقصين ..


ورجعنا البيت .. وأنا لسّه موجّع ..

دخلت .. لقيت الناس .. لامّين ..


شايف أختي هناك .. بتصلّي ..

وأخوي بيتلو في سورة ياسين ..


وجات جارتنا .. خالتي ماريّه ..

أم ناس مايكل .. وناس ياسمين ..


بإسم الرب .. قالت يا حماده ..

حتشفى .. وتبقى من السالمين ..


أنا خايف ما أمشي المدرسه ..

تاني .. وما أقدر ألعب بعدين ..

,,,,,,,,,,,,

ضحكت ..

ضحكت .. وبالضحكه حلاتك يا صابرين


وقالت ليهو .. ما نحن برانا ..

زيّنا في كتير في السودان ..


مرض لا خلّى كبير .. لا صغيّر ..

ده المرض الإسمو .. السرطان ..


وقالوا في ناس ملمومه عشانّا ..

حيتكاتفــــــوا .. قدر الإمكان ..


إيد على إيد .. حيكبّروا كومم ..

وإختاروا الأرقام دي .. العنوان .. (99199)


بيها حيبنوا عماره كبيـــــــــره ..

ونجي نتعالج .. بالمجّـــــــــان ..


وده العشم برضو .. يا بلد



دي قصه خياليه .. على لسان حال طفلين مصابين بالسرطان .. وأكيد في زيها قصص كتيره حقيقيه .. في مستشفى قيد الإنشاء .. إسمها 99199 .. وفي الناس الإتلمّوا عشان يبنوا المستشفى ده ..خلّيك واحد منهم


ممكن تدخل وتشارك .. من الصوره دي


هناك تعليق واحد:

غير معرف يقول...

ربنا يجزيك خير انشاء الله
وربنا يقدرنا انشاء الله ونساعد
وانشاء الله بأذن الله حتكمل المستشفى وحيتحقق احلام ملايين الاطفال والمرضى