الأحد، 17 أبريل 2011

شرف التجربه



صبرك علــــي يا قِليب ..


شـــــابِكنِي .. إتــــروَّى ..


وقلنـا النَّصيب .. بيصيب ..


شوف صبرِي كيف سوَّى..


وإحســاســي .. ما بِيخيب ..


أنا دسّــــيتو فِيـك جـــوَّه ..


ده بكره القـــدر .. بيجيب ..


بــكره البِخـــاف .. بِــقوى..


ووقفت .. قِـدّامــو ..


وأنا عيني في عينو ..


وافكاري فيو هـامو ..


بي كُلْ مضـــامِينو ..


وخوفك .. وأوهامو ..


يا قلبي .. ما بِعينو ..


أرجـوك إعلامو ..


بالبيني .. والبينو ..



ســقتك معــاي .. متفـائل ..


وقايلك .. مخاوفي حتغلِبا ..


وفي خوفك .. إنت مُزاوِل ..


وخــلّيتو عـــــــاده محبَّبه ..


ودي الدنيـــا ما بتجـــامِل ..


وزمنَّــا .. ماشِّي مُصعِّبا ..


يا قلْبي .. كُنتَ تحــــاول ..


كان نُلتَ شرفْ التجـــرُبه .

الخميس، 14 أبريل 2011

إتوسَّمت فيكي الخير

ســـــــودانيّه .. ستَّ النَّاسْ ..

في العين مطرحِك .. والراسْ ..

جمال ولطافه .. ذوق وإحساسْ ..

صِفات لا بتُحصى .. لا بتِنْقاسْ ..

في تاريخنا .. إنْتِي أساسْ ..

والتاريخ عليكي يشيرْ ..

أنا اتوسَّمْتَ فِيكي الخيرْ .

,,,,,,

ســـــــودانيّه .. بِنْتَ النِّيــلْ ..

يا صُبْحاً .. نسيمو عليلْ ..

يا ضيَّ القمر .. بالّليلْ ..

يا شِيتاً سمِح .. بالحيلْ ..

وكُلَّ الوصفوا فِيكي .. قليلْ ..

خصّاك ربِّي .. دُونَ الغير ..

أنا اتوسَّمْتَ فِيكي الخير .

,,,,,,

ســـــــودانيّه .. بِتْ بَلدي ..

وكتَ الحارَّه .. لي سَنَدي ..

تجِيبي السَّلوى لي عِنْدي ..

أنا دايرِك ليَّا .. أُم ولَدي ..

وجيتِك .. ومادِّي ليك يدِّي ..

ونقرا الفاتحه .. قولة خير ..

أنا اتوسَّمْتَ فِيكي الخير .

الثلاثاء، 5 أبريل 2011

أنا عِند وعدِي



يا تمْرَ هِنْدِي ..


لي شوقي ودِّي ..


وكلِّم حبيبي ..


الخدُّو وردِي ..


قول ليو حبيبَك ..


يوم ما بيسيبك ..


وأكِّد عليهو ..


وحياة عينيهو ..


أنا عِند وعدِي ..


ويا تمْرَ هِنْدِي ..


إتوصَّى بيهو ..


وأحكيهو حالِي ..


ده طول إنشغالِي ..


وسهر الليالي ..


أنا بيهو مَرْضِي ..


وطُول ما حبيبي ..


الفي نظَري حالي ..


عايش في بالي ..


وساكن في خَلْدي ..


ويا تمْرَ هِنْدِي ..


قُول بي أمانه ..


لي ناس معانا ..


ده حبيبي نادِر ..


وجمالو فردي ..


أًسلوبو ساحِر ..


راقي المشاعِر ..


وانا ليهو شاعِر ..


وبُرهانِي عِندِي ..


ويا تمْرَ هِنْدِي ..


شايف حبيبي ؟ ..


طوّل بعادُو ..


وزاد في عِنادُو ..


وانا ما بيدّي ..


أخْفيهُو حُبِّي ..


وأسكِّت في قلبِي ..


واقول ليهو أصبُر ..


دي فتره وتعدِّي ..


ويا تمْرَ هِنْدِي ..


يا هَناي وسعْدِي ..


في قِليبي دارك ..


وانا قلبي دارك ..


وقِبْل التحدِّي ..


ويا القمره دورِك ..


وبهاك ونُورِك ..


ما أظِن حيُبدي ..


لي خاطرِي فِكره ..


بينكُم أقارِنْ ..


ده حبيبي فاتِنْ ..


ودلالو فِطره ..


يا ذُو الجَّلالِ ..


يا عزِيزْ .. ومُهدِي ..


صلاتي وسلامي ..


لي نبينا أُهدي ..


أقبل دعايَ ..


وحقِّق مُنايا ..


أنا قلبي عاشِق ..


لعشوقو أدِّي .