إتوسَّمت فيكي الخير

ســـــــودانيّه .. ستَّ النَّاسْ ..

في العين مطرحِك .. والراسْ ..

جمال ولطافه .. ذوق وإحساسْ ..

صِفات لا بتُحصى .. لا بتِنْقاسْ ..

في تاريخنا .. إنْتِي أساسْ ..

والتاريخ عليكي يشيرْ ..

أنا اتوسَّمْتَ فِيكي الخيرْ .

,,,,,,

ســـــــودانيّه .. بِنْتَ النِّيــلْ ..

يا صُبْحاً .. نسيمو عليلْ ..

يا ضيَّ القمر .. بالّليلْ ..

يا شِيتاً سمِح .. بالحيلْ ..

وكُلَّ الوصفوا فِيكي .. قليلْ ..

خصّاك ربِّي .. دُونَ الغير ..

أنا اتوسَّمْتَ فِيكي الخير .

,,,,,,

ســـــــودانيّه .. بِتْ بَلدي ..

وكتَ الحارَّه .. لي سَنَدي ..

تجِيبي السَّلوى لي عِنْدي ..

أنا دايرِك ليَّا .. أُم ولَدي ..

وجيتِك .. ومادِّي ليك يدِّي ..

ونقرا الفاتحه .. قولة خير ..

أنا اتوسَّمْتَ فِيكي الخير .