بديت

بديت أقرّب من حبيبي ..

وكنت حاير .. أبدا من وين

كنت شايف السكّه صعبه ..

ومستحيل يمشوها إتنين

كنت قايلو بعيد .. وناسي

لقيتو أقرب منّي للعين

لقيت حياتي معاهو أجمل ..

ومافي أجمل من حبيبين

,,,,,,

بديت أكلّمو عن خواطري ..

وحبّي ليهو .. المالي قلبي

وعن حراري شوقي لمّن ..

يبقى مافي .. وما بقربي

ويفضل الليل كلّو .. طيفو ..

من عيوني النوم يخبّي

أنا في عيوني لقى السعاده ..

وفي عيونو .. شكيتو ربّي

,,,,,,

بديت أشوف في عيونو ريده ..

ومن كلامو معاي حسّيت

إنّو باقي عليّ برضو ..

وما حيكسر خاطري .. لو جيت

وقبل ما أودّع حبيبي ..

قطفت ورده .. وليهو أهديت

أنا أصلي ما ملّيت بقربو ..

وزي عيونو الحلوه ما لقيت.

وعلى قولك يا حوته : شاعر إنّي بريدك كلّي .. من قدمي لي سبيبة راسي

بلد الحديد والنار

أنا مامشيت عطبره كتير .. مع إنها بلدي .. لكن يوم الأمشي أسلم على أهلي من أمّي وابوي .. بتوه رسمي .. مثلاً بدخل بباب أخضر في ناصية الشارع .. وأطلع بباب أزرق .. نهاية الشارع .. يعني بإختصار عطبره كلها أهلي .. ولمّا أرجع العاصمه أبوي يسألني .. لاقيت ناس فلان؟.. مشيت على ناس فلان؟.. شفت بيت جدودك؟.. بحس بنبرة شوق قويه في صوتو .. ويقعد يحكي لي عن عطبره .. وعن ناس عطبره .. وألقى نفسي مشيت عطبره .. وما عرفتها كويس برضو ..ما زي أبوي.

معليش..معليش يا عطبره .. الظلم حار والله .. بس ده حال الكوره .. أنا ما بكتب عن الكوره في المدونه دي .. بس لمّا تشوف ظلم زي الحصل للأمل العطبراوي .. لازم تقيف شويه ..تسلّل وااااضح ..والحكم ما قال حاجه .. أتذكر أبوي يوم كوره الأمل مع أتراكو .. كان بيقول (الله يا عطبره) .. فرحان بالفوز .. وآخر كوره كانت النغمه متغيره شويه .. (الله يا عطبره) .. وفيها شعور بالظلم .. لكن معليش تاني .. الحمد لله على كل حال .. الحمد لله إنهم حيشاركوا في البطوله الجايه .. الحمد لله إنهم شرّفونا .. ودي كانت أول مرّه يشاركوا في بطوله خارجيه .. والمره الجايه إن شاء الله .. قطار الأمل مافيهو عربيه فرامل.

الله يا عطبره ..

الله يا أمل سودانّا

نهواكي في حلّنا ..

ونطراكي في ترحالنا

أهلِك .. حريم ورجال ..

البرّه ..... والقاعدين

شالوكي فوق الراس ..

وختّوا الأمل في العين

يارب .. ديمه بيقولوها ..

وقت الفرج .. والشدّه

والراجي الأمل في دعاهو ..

من الله ما بينصدّ

شفتي الأمل يا أمي ..

ظلموهو يوم الكوره ..

أولادِك إنتي فهود ..

بس الرشوه لعبت دورا

يوم تاني..نفرح بيهم ..

والفرحه تبقى اتنين

يوم اليجيبوا الكاس ..

ويجوكي ناس غايبين

يا عطبره الحلوه ..

كيف ناسك الطيبين

مدني البعيد بينادي ..

يا أمي .... مشتاقين

يا بلد الحديد والنار ..

إسمِك ...على مسمّى

دي المدفعيه بتضرب ..

تعظيم سلام .... ليك يُمَّا.

وعلى قول البلابل : نسايم عطبره الحلوه.. تهدّينا وترسّينا

إهداء خاص لصديق

سمعت كتير عن ناس ما بتحلم ..

مع إنها بتنوم زي غيرا

سمعت عن البيخلوا قلوبم ..

تشتري وتبيع في مصيرا

وقالوا الدنيا بتحكي حكايه ..

ليل ونهار في قصه مثيره

بيبدا اليوم بنهار ريدتنا ..

وينتهي يومنا بغربه وحيره

يجينا الليل ويغطي جبالو ..

ويفتح نار الشوق والغيره

,,,,,,,,,,,,,,

سمعت عن البيحب بشجاعه ..

وجوّات قلبو ملاها الخوف

سمعت عن البيعيش..مستغني ..

عن البيحبو..بقلب عطوف

وقالوا زمان الناس مرتاحه ..

ما بتشتكي من هم وظروف

ونحن زمنّا ده حيرناهو ..

بيضرب لينا كفوف في كفوف

أحسن نرجع زي ما كنّا ..

لا نسمع..لا نحس..لا نشوف.

نور عيونك

مالو لو حنّيتي مرّه ..

وقلتي لي أنا ليك حبيبه

كانت الأحزان تغادر ..

والسعاده تكون قريبه

والطيور تصدح بأسمك ..

والزهور أنا ليك أجيبا

أنا ما لقيت غير نور عيونك ..

يزيد علي ناري ولهيبا

,,,,,,

مالو لو لاموكي فيني ..

ده أصلو طبع الناس..يحيّر

مرّه شكّروا ليك خصالي ..

ومرّه قالوا علي صغيّر

ومهما لاموا في حبّي ليكي ..

مستحيل اللوم يغيّر

وما لقيت غير نور عيونك ..

يزيد علي عمري القصيّر

,,,,,,

ومالو لو حبّينا بدري ..

ده العمر ما عندو صاحب

نمشي بين الناس أحبّه ..

ونلقى كلّ الناس تعاتب

وما أظن يقدروا علينا ..

ده وحدو ربّنا لينا غالب

وأنا مالقيت زي نور عيونك ..

لا في القمر .. لا في الكواكب.

وعلي قولك يا وردي : يا نور العين ....