انا يا قلبي .. ما لي غيرك

يا قلبي ..ما تريد من وراي

ورّيني تاني ..

قبل تريد

سايبني للأشواق ..بــــــراي

وانا ما حمِل ..

شوقي الشديد

..

ما مسامحك أنا ..يوم قلت لي

يللا نمشي ..

علي الحبيب

من ديكَ ..وانا حــــالتي العلي

ما بترضِي ..

لا عدو .. لا قريب

..

لاقيتو ..نسّاني الإسم

ده لو ماقلتو ..

بالمقلوب

صافحتو ..وانا خانّي الجسم

وبقيت ..

علي أمري مغلوب

..

بي عيونو ..ده منو الما سِمِع

الصادفِن ..

ياهو الغِرِق

والجيد تقول ..تمثـــــال شمِع

لا فيهو كسره ..

ولا عِرِق

..

ما ينفع أوصِف ..في حدود

إن دُرتَ ..

أوصف بسمتو

وعلى الورود ..الفي الخدود

سبحان ربِّي ..

وحكمتو

..

حبيبي هناك سمِع ..دقّاتك الولهانه

ووريتو إنّي عجول ..

ناقصاني طولة البال

وأنا برضو أستاهل ..كمان بأمانه

يوم باريتك إنتَ ..

وخليتني مكشوف حال

..

ورّيتني النجوم ..نصّ النهار يا قلبي

والنوم شلتو ..

من عينيّ عزّ الليل

وانا شوقي الشديد ..ما قدرت ليهو أخبّي

إنت مُصِر تظهّرو ..

وباقي ليهو دليل

..

وبيني وبين نفسي ..بدعو عليكَ الله

واقول في سرّي . شكراً ..

يا قلبي كتّر خيرك

وداير أشِقو صدري ..وأخليكَ تدّلى

واتراجع .. واضمّك ..

انا يا قلبي .. ما لي غيرك .

وعلي قولكم : ياقلبي ماك هيّن .

99199

ليه ماجيت يا حماده المدرسه ؟ ..

فايتاك حصّه عربي .. ودين ..

كل أصحابك بسألوا عنّك ..

وباقي المدرسه .. قلقانين ..

منى وإقبال جايين بوراي ..

وناس عبّودي حيجوا بعدين ..

مالك .. خير .. من شنو متضايق! ..

كنت كويس .. وحسّه حزين؟ ..

,,,,,,,,,,,,

أنا لي كم يوم .. قاعد أتألّم ..

زي ألمِك داك .. يا صابرين ..

ودّوني الدكتور .. أمبارح ..

وكشفوا علي مرّه .. وإتنين ..

وقالوا علاجك عندنا .. ســـاهل ..

بس الدوا والمستشفى .. الناقصين ..

ورجعنا البيت .. وأنا لسّه موجّع ..

دخلت .. لقيت الناس .. لامّين ..

شايف أختي هناك .. بتصلّي ..

وأخوي بيتلو في سورة ياسين ..

وجات جارتنا .. خالتي ماريّه ..

أم ناس مايكل .. وناس ياسمين ..

بإسم الرب .. قالت يا حماده ..

حتشفى .. وتبقى من السالمين ..

أنا خايف ما أمشي المدرسه ..

تاني .. وما أقدر ألعب بعدين ..

,,,,,,,,,,,,

ضحكت ..

ضحكت .. وبالضحكه حلاتك يا صابرين

وقالت ليهو .. ما نحن برانا ..

زيّنا في كتير في السودان ..

مرض لا خلّى كبير .. لا صغيّر ..

ده المرض الإسمو .. السرطان ..

وقالوا في ناس ملمومه عشانّا ..

حيتكاتفــــــوا .. قدر الإمكان ..

إيد على إيد .. حيكبّروا كومم ..

وإختاروا الأرقام دي .. العنوان .. (99199)

بيها حيبنوا عماره كبيـــــــــره ..

ونجي نتعالج .. بالمجّـــــــــان ..

وده العشم برضو .. يا بلد

دي قصه خياليه .. على لسان حال طفلين مصابين بالسرطان .. وأكيد في زيها قصص كتيره حقيقيه .. في مستشفى قيد الإنشاء .. إسمها 99199 .. وفي الناس الإتلمّوا عشان يبنوا المستشفى ده ..خلّيك واحد منهم

ممكن تدخل وتشارك .. من الصوره دي

من يومي الحبّيتك

من يومي الحبّيتك

شفت كلّ الدنيا حلوه ..

والفرح ما ليهو آخر ..

والسعاده تزيدني سلوى ..

وقلبي فايض بالمشاعر ..

والعيون بتلالي .. نشوى ..

لي أمل .. ميعادو باكر ..

......

أنا من يومي الهنّيتك

أتمنّى لو يوماتي أقدر ..

كل يوم .. أنا ليك أعايد ..

أصلي هايم بيك .. وأكتر ..

وكلّ ما لي .. ماشي زايد ..

بس حأعمل أيه .. حأصبر ..

أنا كلّي عاشقك .. وليك رايد ..

......

من يومي اللاقيتك

كنت قايلك في الحقيقه ..

لقيت خيالك هو البجيني ..

وبقيت أفتش في طريقه ..

عن شمالي .. وعن يميني ..

تخليك تجلس .. لو دقيقه ..

تفضل معاي .. وتشوف حنيني .

أنا من يومي الحبيتك ..

الله .. الوطن .. الهلال

مالِينــــــــا حُبّك يا هــــــــلال ..

إسمك أصِل .. ما إنتحـــــــال ..

طعم إنتصاراتـــــــك .. زلال ..

نسّيتنا بالأمل .. المُحــــــــال ..

وورّيتنا أولادك .. أبطـــــــال ..

من غير تردّد .. أو ســــــؤال ..

عبروا المتاريس .. والجبــال ..

وجمهورك .. الواسع مجـــال ..

واقف معاك .. في كلِّ حـــــال ..

رافعين شعارك .... في السما ..

اللّه ...... الوطن ...... الهلال

بعد داك تجي الشوكولاته.