رضاك يا يُمّـــــا

أقول أدّيك هديّه بسيطه .. مِن جوّايا ..

تليق بمقامك إنتي .. وتقبليها .. منايا ..

ألقى هديتي ما بتكفّي .. لحظه معايا ..

وكت الشفت في عينيك .. أبلـــغ آيه ..

وقلتي ليّا .. منّك عافيه تب يا جنايا ..

رضاك يا يُمّا إنتي رضاكي أنبل غايه ..

ومهما عملت ليك .. يا يُمّا ما بوفيكي ..

يوم الأبكي .. أشوفا دموعي في خدّيكي ..

وكتين أضحك .. ألقى الفرحه في عينيكي ..

وحاتِك يمّا .. وقولة يُمّــا حبّه عليكي ..

أجيب الدنيا .. كلَّ الدنيا .. بين إيديكي ..

وربّـنـا قـال ..

رضاهو بيبقى .. يوم أرضيكي .

كل سنه طيبه يا أُمّي .. وكل أم في الدنيا .. أُمّي .

عُقدةُ الحُب

أيا طبيبَ الحُبِّ ..

يا ترياقَ العاشقينْ ..

يخشى عليكَ النَّاسُ ..

مِن غدرِ السنينْ ..

ماذا تركتَ لنا ! ..

وكُنتَ لنا مُعينْ ! ..

وآثرتِ أنْ تمضيَ ..

مرفوعَ الجبينْ ..

والقلبُ أحنى ظهرَه ..

عِشقٌ دفينْ ..

لا يستطيعُ البوحَ ..

بِه إلاَّ بالأنينْ ..

تُلقي به العَبَراتُ ..

في بحرِ السُكونْ ..

وعواصِفُ الآهاتِ ..

حُبلى .. بالظُنونْ ..

أتُراهُ يشْعُرُ بي ؟ ..

أيعرِفُ مَنْ أكونْ ؟..

أيثُورُ قلْبِيَ باكِياً ..

فتفْضَحه العُيونْ ؟ ..

لا ..

وأنا الطبيبُ ..

العاشِقُ .. المكلُومُ

ناصِحُك الحنونْ ..

فالحُبُّ عِندَكَ .. يا صديقي ..

عُقْدةٌ .. وأوّلُه شُجونْ ..

بِيديكَ أنتَ شفاؤه .. وإلاَّ ..

فآخِــرُهُ .. جُنــونْ .

من نظره بسْ

يا قلبي .. حِسْ ..

ما خوفي منَّك ..

خوفي ليك يوم تنتكِسْ ..

وترجع تقول ..يا ريتو كان ..

ما تُهتَ في عيونو الحُنان ..

وودّيت رجولي علي الحرسْ ..

وهو عيونو مليانات حرسْ ..

حواجبو مرسومات مقاس ..

ودي خِلقة الله .. من الأساس ..

أمَّا الرموش .. دي براااااااها كوم ..

بيناتا .. تفكيري التبسْ ..

حارسات عُيون؟ .. حارسات دُررْ؟ ..

أهو ده البقولوا علي السِّحر؟؟؟ ..

أسر القِليب .. وسبى النّظر ..

والله .. جد ..

ما شُفت مِتلو علي البشر ..

يا قلبي ..هُس ..

وبالراحه .. روق ..

فاضحاني دقّــاتك .. عديل ..

لا الّليله .. لا مِن يوم أمِسْ ..

كشفوك .. وسمعوك ناس كِده ..

ده من نظره بسْ؟ ..

تُهتَ .. وبِقيت سارِح براكْ ..

ومشيت .. وخلّيتني بوراكْ ..

لي زول .. مُناكَ يكون معاكْ ..

وانا قلت ليك ما بمنعكْ ..

بس خوفي .. كان راجلاً كلسْ ..

ما بمنعك .. حِبْ .. واشتهي ..

ده العُمرِ يومين .. وينتهي ..

يللاكَ .. نمشي ليها هي ..

ومصيرنا نوعاهو الدرِسْ ..

والكاتبو لينا المولى .. خير ..

أقلّو .. يرتاح الضمير ..

ولو ما قِسمتك .. أو كان في .. غير!

ما تجِيني .. داقِّي لي جــ ..

حق .. مشــــروع

أسيبُو ؟ .. بعد أسرني هواهُو ؟ ..

كيفِن أسيبو ؟ .. وامشي لمين ؟ .

حبيبي .. منايا .. يوم ألقاهو ..

حالف .. أهدي ليو .. ياسمين .

ورِد أبيض .. نبيل معناهو ..

يفوح بشذاهو .. للباقين .

يصون لي حبَّنا .. ويرعاهو ..

خلِّيكم كمان .. شاهدين .

سِمِعتو ؟ .. قِليبي بالتحرير ..

ينادي .. وليهو صوت مسموع .

أرحل .. يا ظلام الخوف ..

ده في وشَّ الكتاب .. مطبوع .

" أنا ما أجرمتَ .. يوم حبّيتو ..

ولي .. في حُبِّي .. حق مشروع ".

وبكره النور .. حيمحي ظلام ..

بكره بضوِّي حُبِّي .. شموع .

نويت .. والنيّه زاملة سيدا ..

أقول للناس .. حبيبي يعيش .

واخلي القالوا ليَّ .. حبيبك ..

كِذبه .. يقولــوا لي .. معليش .

وأكِّد ليهم .. إنُّــــو حقيقه ..

بس .. ماف داعي للتفتيش .

ومش لو جابوا لي بوليس ..

ما بسيب حُبِّي .. لو جا الـ ...