ما عرفتيني .. لسّه

إنتي ما عرفتيني لسّه ؟..
أنا كنت بستناكِ ديمه ..
مرّه قاعد .. ومرّه واقف ..
في مزاراتنا القديمه ..
كنت يوم ألحظ عيونك ..
بتوه .. في أفلاكا .. وسديما ..
ده حتّى قلبي المات شعورو ..
من كلام عينيكي حسّ .


إنتي ماعارفاني لسّه ؟..
حاولي أتذكّري شويّه ..
يوم سألتي عيوني عنّك ..
وعن مشاعري الليك .. قويه ..
شبّهتْ ليك بي علاقة ..
قيس .. وليلى العامريّه ..
طالما الناس ما نسوهم ..
يبقى كيفن ليكي أنسى ؟ ..


إنتي ما عارفاني لسّه ؟ ..
البينّا ما محتاجلو عِرفه ..
ده القدر رتّب لِقانا ..
يعني ما اتلاقينا صدفه ..
وبكره حنتمّم مُرادنا ..
بي وصال .. ووئام .. وإلفه ..
إنتي لسّه الحيره مالياك ؟ ..
يبقى ما عرفتيني .. لسّه .


وعلي قولكم : الما بيعرفك ......