قُبلة الحياه

إختار عقلي ..

البعد عن زخم الحياه ..

واستسلم القلب الجريح ..

لكلّ ما أعياه ..

فتناثرت أجزاء أملي ..

مثل قطرات المياه ..

وتجمّعت أصوات ألمي ..

لتسكت الأفواه ..

حتى متي يرضخ ..

القلب لكلّ ما عاناه ..

هل يا ترى سيذوق ..

طعم الحبِّ في دنياه ..

لينير درب حياته ..

ويعيده من منفاه ..

أتداركت ليلى ..

بأنّ شفاءه .. في لقياه ..

لقيا حبيبٍ قد ملأ ..

بشعره .. كأس هواه ..

قد فضّل الطيف الجميل لليلى ..

دون سواه ..

جاءت .. وصارت قربه ..

وقربها ما يتمنّاه ..

وأتى الصباح ..وودّعته ..

وفراقها ما كان يخشاه ..

وعلى الخدّ .. تركت قُبلة ..

أسميتها قبلة حياه .

وكلٌ يغنّي على ليلاه...

40 يوم

أنا محمّد .. سليل ناساً ..

يقابلوا الجفوه بالتحــنان

نسامح كلّ من عـــــادانا ..

نمسح .. دمعة الحزنـــان

نسابق الخيل .. لفعل الخير ..

نجيب التايهه .. للحيران

ووقت الشدّه .. نحن جبال ..

ويوم الحارّه .. في الميدان

تشوفا عيونّا .. حمره شرار ..

وما بتفرز وسطنا جبـــان

بيشهد لــيهم التـــــــاريخ ..

ديل شايقيه جد .. شجعان

ناس محروسه من العين ..

بي إسم الله .. والقرآن

يارب .. لو الكلام ما فيهم ..

بطلب منك أنا .. غفران

,,,,,,,,,,,,,,,,,,,,,,,,,,,

أنا محمّد .. ولد مدني ..

منو القال ما بيعرفني

أنا التالت من أحفاد جدّي ..

وذاك النسب .. يشرّفني

أنا الخلّيت همومي وراي ..

وبهموم غيري .. متهنّي

تقيلة الناس .. بشيلا براي ..

وشيلي .. بخلّي مستنّي

أقاسمو .. مع البيستاهل ..

أشيل عنّو .. ويشيل منّي

أنا عن نفسي .. قلت كتير ..

أنا بقيت في التسكّتني

عشان قالوا التكبّر .. شينه ..

ووسط الناس .. بِصغّرني

كمان قالوا التواضع .. زينه ..

وعند المولى .. بيكبّرني

اللهم إني أعوذ بك من أن أشرك بك شيئاً أعلمه .. وأستغفرك لما لا أعلمه

أغلى من الدهب

حبوبه زمان قالت الداعي .. مدعي .. بس دي لحظة غضب .. وربنا كريم .. ومسامح

كان غيرك أشطر يا قلب ..

شوف ليك شغله ..

بس ما تحب ..

تاني .. وتتوه من الدرب ..

وما تلقى لعذرك ذنب ..

طنٍّش .. وعيش ..

ما تكتئب ..

واضحك مع الناس ..

وإنطرب ..

دي الضحكه بتحلّي الصعب ..

وسيبك من الهم .. والتعب ..

واصبر على الحال الغلب ..

ده الصبر أغلى من الدهب

وتاني التوبه .. لي حبوبه

يا دنيا .. مافيكي إلا أنا

يا دنيا .. مافيك زول صبر ..

في ريدو زي شخصي الضعيف ..

قلّبتي قلبي علي الجمر ..

وجراحي ماليها النزيف ..

وكحّلتي عيني بالسهر ..

ودمعي ما داير يقيف ..

وشيّلتي راسي الهم .. جبُر ..

ومنّي .. شلتيهو الوليف ..

يا دنيا .. مافيك إلا ده؟ ..

حارماني منّو .. بلا سبب؟..

ده حبيبي .. واكتر من كده ..

هو الشاغل البال والقلب ..

سايقاهو ريدي معانده ..

وانا برضو .. سايق في الدرب ..

بس أخديها منّي مؤكّده ..

ما قصدي أرمي عليك عتب ..

يا دنيا .. مافيك إلا انا؟ ..

ورّيني بس .. لمتين تدوم ..

حالة التباريح .. والعنا ..

عشان أبقى جاهز .. لقدوم ..

حبيبي .. ويرجع لي هنا ..

ونعيش هناك .. وسط النجوم ..

ويا دنيا .. سيبِك مننا ..

ده أصلو حالِك .. ما بيدوم.