يا حُوت الغلابــــــى

الدّنيا كم شالت ..

ودُموعنا كم سالت ..

بس زي فراق محمود ..

رجلينّا ما شالت ..

أحزان على الكاهل ..

أحزان بلد كامل ..

كان في السؤال واصل ..

ورّونا أيه حاصل  ..

محمودنا كيف عامل ؟ ..

قالوا شايل جِراح غايره ..

وآلامو مُتضايره ..

ورا بسمة مكلومة ..

وبيغنّي لينا الحُب ..

بي نغمة مكتومة ..

وما كُنّا عارفِنّو ..

وما كُنّا حاسِّنو ..

بس كُنّا شايفِنُّو ..

بيوزِّع الأفراحْ ..

بيناتنا بس .. بِرتاحْ ..

دي سمحة الصُدَف يا صاح ..

الجابتك فينا ..

خدعوك .. ولاموكِ ..

الما بيعرفوكِ ..

معقولة بس .. ننساك ؟ ..

معقولة بس ياجان ؟ ..

كيف ما يحبّوكِ ..

يا جنّة الأطفال ..

يا روضة من غير باب ..

يا قائد الأسطوال ..

يا للبلد جوّاب ..

دي السِبْحة في يدَّك ..

يوم تمشي للديوان ..

هاك يا عشا الضّيفان ..

تعريفة مِنْ جِدَّك ..

طرُّونا ليك يا حوتْ ..

قالوا في العِناية ..

ساب البلدْ .. محمود ..

ترعاك العِناية ..

يا شمس المزاد ..

يا حُوت الغلابى ..

يا شوق العُيون..

يا فرِح التعابى ..

يا فرع الحروف ..

يا أصْل الكِتابة ..

يا سودان معاني ..

يا غرب الرِمال ..

يا شرق المواني ..

يا جنوب .. وإتشال ..

يا شمال تمْرُو داني ..

وين يا البعادك طال ..

كُلْ ما سألنا عليك ..

ترحل غمامة ..

يا حوت .. منو القال ليك ..

تكفي إبتسامة ..

سكت الرّباب الفيك ..

وكلِّ الشباب يبكيك ..

حوته .. مع السلامة ..

مطلوب رجال

هي :

هذِه الرُّوحْ .. تشتاقُ إليكْ ..

هذِه الرُّوحْ .. لكَ تشتاقْ

ومضيتَ .. وكأنّما أعجبَك الفُراقْ ..

وتركْتَ الّذي كان بينَنا ..

للماضِي .. والإحْتراقْ ..

هي الرُّوحُّ .. هي الرُّوحْ .. هي الرُّوحْ ..

تَشتــــــــــــــــــــــــــــــــــاقْ .

هو :

أنا لم أبتعِد إلّا قليلاً ..

تائِهاً .. وبِلا صَديقْ

وطرقْتُ أبوابَ الزّمانِ .. مسائِلاً ..

أينَ الطَّريقْ !!!!

ووجَدْتُ عينيكِ الطريقْ .

وأنا المُسافِرُ .. والغريقْ .. عَجبِي !!!!

كيفَ .. وأنا في بحْرِ عينيكِ . .

أشْعُرُ بالحريِقْ !!!!

فلا تَحسبيِني مُرغَماً يا حُلوتِي ..

بل عامِداً ..

فالرُّوحُ للّقيا تتُوقْ .

واليأسُ مِن لُقياكِ ..

أسْدلَ سَترَهُ ..

وأمَلِي بأنْ ألقاكِ ..

بَاتَ هو الشُّرُوقْ .

والرُّوحُ قدْ سَمِعتْ نِداكِ ..

والشّوقُ أبْعَدَ ما يَعُوقْ ..

فالشّوقُ في جَسَدِي يفُوقْ .

فبِدونِه ..

أنا لا أحسُّ .. ولا أرى ..

بل لا أشُمّ .. ولا أذُوقْ .

جَسَدِي تَعلّقَ بالِلِّقاء ..

والرُّوحُ للّقيا تَتُوقْ .

وأنا وأنْتِ .. طريقَنَا يبدُو بعيداً ..

مُسْتَحيلاً .. مُرْهِقاً ..

صَعباً وشَاقْ .

والحُبُّ .. في نَظَرِ الجمِيعِ مَشقّةٌ ..

وأنا وأنْتِ .. فحبُّنَا حُلُو المَذَاقْ .

فهيّا بِنا يا حُلوَتِي ..

لِنُرِي الرّفاقْ .

فقطِ إعْلَمِي .. يا حُلوَتِي ..

هذه الرُّوحُ تشْتاقُ إليكِ ..

هيَ الرُّوحْ .. هيَ الرُّوحْ .. هيَ الرُّوحْ ..

تَشْتَــــــــــــــــــــــــــــــــــــــاقْ .

السؤال هو : من المطلوب !

وداع .. في مُنتهى الطِيبه

شكلِك نِسيتي .. خلاصْ ..

وطوّلتي في الغيبه ..

وودّعتي كلَّ النّاس ..

وسِبتيني في رِيبه ..

قلبِك ده كان حسَّاس ..

كان في منتهى الطيبه ..

وبقى زيِّو زيَّ النّاس ..

ليه يا أحنَّ حبيبه ؟ ..

,,,,,,

أقلّو كان تستنِّي ..

كان تستشيري ضميرِك ..

وفي وداعي كان تتأنّي ..

ده حتّى الوداع بيضيرِك ؟ ..

أنا صبرِي فيك لازِمني ..

عسى تعتِقيهو أسيرِك ..

قلبي .... اللِي ما مُتْمنِّي ..

في الدُّنيا يعشِق غيرِك ..

,,,,,,

أنا شكلي إتعجّلت ..

وقت الحكمْت عليكي ..

لو كُنت إتمهّلت ..

وشُفت الخجل ماليكي ..

ما كنت إتلوّمت ..

وقدّرت خجلِك فيكي ..

يا ريتني لو كان مُتَّ ..

وما أشوف وداع عينيكي ..

لِينــــــه

لا شُفناك .. ولا شُفتينا ..

لا لقيناك .. ولا لقيتينا ..

بس .. حرّكتي شيتاً فينا ..

مِن زمناً بعيــــد مابينا ..

يادوب حسّه حنّ علينا ..

وقلنا الصبر حيداوينا ..

صبرنا ونُلنا .. يوم جيتينا ..

شُفنا عيون جميله .. حنينه ..

بِنيَّه صغيره .. إسمها لِينه ..

عيونا تلالي .. ليل ونهار ..

عيون ضوّايه في الأسحار ..

عيون سايقاني لي مُشوار ..

دُروبو عِشِق .. طريقو بِحار ..

وانا العاشِق .. أنا البحَّار ..

قِليبي فرشتو ليكي ديار ..

قلِب في هواكي ما إحتار ..

عشانِك بس .. يخوض النّار ..

مُقدّس .. وما حمل أوزار ..

CTS - IT - 2001 ورّوني بس .. مين زيّنا

مين زيّنا .. ورّوني بس .. مين زيّنا ..

2001 من بدت .. جات دفعه .. واتلاقت هِنا ..

من ديك .. وعيك .. ما اتفارقوا .. تامّين ولامّين في هنا ..

رغم البعاد .. رغم البلاد .. والموت كمان شال مِنّنا ..

في قلوبنا والله العظيم .. ما غبتوا لحظات عنّنا ..

فيك يا التقانه وتقنيه .. لقب (التميّز) حقّنا ..

ساعة الحُزن .. ساعة الفرح .. رمضان كمان بيلّمنا ..

و 2001 .. وإنتهت .. وأهُم نِحن .. من سنه لي سنه ..

يا ربّي لي باقي العُمر .. يوماتي تجمع شملنا ..

ويا دفعه .. معليش في السؤال .. ورّوني بس .. مين زيّنا .

فايتِك كتيرْ

فايتِك كتيرْ ..

لو ماكي عارفه معزّتِك ..

عندِي بتساوي الدُّنيا .. والنَّاس أجمعينْ ..

واكتر كتير ..

ما الدنيا يوما الجابتِكْ ..

ضِحكتْ معاي .. خلّت عِنادا .. بدت تلين ..

ودي النِّاس تغير ..

وكتين يكونو في حضرتِكْ ..

ما شافوا لجمالِك مثيل ..

في الرِّقه .. في الطبع الرَّزين ..

كمان إنتي غير ..

في لفتتِكْ .. في مشيكِي أو في وقفتِكْ ..

يحاكيكِي طير العندليب ..

في الضَّحكه في الصوت الحنين ..

ده حتّى العبِيرْ ..

الفاح .. هَجر أزهارو صافح لمستِكْ ..

شال في بنانِك .. وإستراح ..

بي عِطرُو فايح ومستكينْ ..

والبدرِ كامِل .. مستدير ..

أيش جاب لِجاب .. معَ طلّتِكْ ..

صدق اللي قال .. يا اخوانّا ورُّونِي الفرِق ..

ضيَّ القمر .. وللا الجبيِنْ .

جــــاهل .. وبَتعلَّـــــم

وانا في حضرة جميل .. ساحر ..
بِدونْ ما أدري .. أتبسَّـم ..
واشوف في عيونو شي .. آسر ..
يخلّـي عيونـي تتكلّم ..
ودقّات قلبي .. بِتْجاهِر ..
عسى ولعــلَّ .. بي يعلـَـم ..
وفي عيوني .. الغرام ظاهِر ..
ولســاني .. حِليلُــو إتبلـَّــم ..
بِقيت بين بين .. وفي الآخِر ..
عقلـي معــاهُو إتقسّـــم ..
بين مجنون .. وبين شاعِر ..
وبين جاهِل .. وبتعلّـــم ..
وده حالتي مُراجِـع ومُذاكـِـر ..
كتـــاب الريــده .. والمُعجم ..
وفي قصص الهوى .. مُساهِر ..
وبي بثينه وجميل .. بحلـم ..
وبعد ده .. حبيبي ما شاعِر ..
بــراي في ريدي.. بتألّـــم ..
دحين ياقلبي .. ما تكـــابِر ..
ولأمر الريده .. إستســلَم .

شرف التجربه

صبرك علــــي يا قِليب ..

شـــــابِكنِي .. إتــــروَّى ..

وقلنـا النَّصيب .. بيصيب ..

شوف صبرِي كيف سوَّى..

وإحســاســي .. ما بِيخيب ..

أنا دسّــــيتو فِيـك جـــوَّه ..

ده بكره القـــدر .. بيجيب ..

بــكره البِخـــاف .. بِــقوى..

ووقفت .. قِـدّامــو ..

وأنا عيني في عينو ..

وافكاري فيو هـامو ..

بي كُلْ مضـــامِينو ..

وخوفك .. وأوهامو ..

يا قلبي .. ما بِعينو ..

أرجـوك إعلامو ..

بالبيني .. والبينو ..

ســقتك معــاي .. متفـائل ..

وقايلك .. مخاوفي حتغلِبا ..

وفي خوفك .. إنت مُزاوِل ..

وخــلّيتو عـــــــاده محبَّبه ..

ودي الدنيـــا ما بتجـــامِل ..

وزمنَّــا .. ماشِّي مُصعِّبا ..

يا قلْبي .. كُنتَ تحــــاول ..

كان نُلتَ شرفْ التجـــرُبه .

إتوسَّمت فيكي الخير

ســـــــودانيّه .. ستَّ النَّاسْ ..

في العين مطرحِك .. والراسْ ..

جمال ولطافه .. ذوق وإحساسْ ..

صِفات لا بتُحصى .. لا بتِنْقاسْ ..

في تاريخنا .. إنْتِي أساسْ ..

والتاريخ عليكي يشيرْ ..

أنا اتوسَّمْتَ فِيكي الخيرْ .

,,,,,,

ســـــــودانيّه .. بِنْتَ النِّيــلْ ..

يا صُبْحاً .. نسيمو عليلْ ..

يا ضيَّ القمر .. بالّليلْ ..

يا شِيتاً سمِح .. بالحيلْ ..

وكُلَّ الوصفوا فِيكي .. قليلْ ..

خصّاك ربِّي .. دُونَ الغير ..

أنا اتوسَّمْتَ فِيكي الخير .

,,,,,,

ســـــــودانيّه .. بِتْ بَلدي ..

وكتَ الحارَّه .. لي سَنَدي ..

تجِيبي السَّلوى لي عِنْدي ..

أنا دايرِك ليَّا .. أُم ولَدي ..

وجيتِك .. ومادِّي ليك يدِّي ..

ونقرا الفاتحه .. قولة خير ..

أنا اتوسَّمْتَ فِيكي الخير .