سرّنا في بير

سرّنا في بير .. ما عارفو غيري ..

وغيرك إنتي .. وكم نفر ..

والكم نفر ديل .. حوالي ..

سبعه مليار بس .. بشر ..

كل العطور .. كل الزهور ..

حتّى الطيور .. الفي الشجر ..

من غير قصد .. بتقولوا يومي ..

للما بيعرف .. ريدتي ليك ..

كان في البدو .. أو في الحضَر ..

وقالوا البِريد .. لو دسّه ريدو ..

قليبو بتحوّل حجر ..

وأنا قلبي ما بيعرف يدس ..

وكلّو مكتوب في القدر ..

سرّنا في بير .. ما عارفو غيري ..

وغيرك إنتي .. وكم نفر ..

دي الشمس فضحتو بالسراب ..

والغيمه .. بي صوت الرعد ..

نادت حواليها السحاب ..

وبقت تأشّر بالبرق ..

ولملمت باقي الصِحاب ..

يا أخوانّا .. ورّوهو التراب ..

لو حتّى .. بي زخّات مطر ..

سرّنا في بير .. ما عارفو غيري ..

وغيرك إنتي .. وكم نفر ..

والنيل طلع ..

عارف الحكايه دي من زمان ..

ورّوهو إتنين ..

لا بتجمعم المشاوير .. لا المكان ..

حاول يداري القصّه .. لكن ما قدر ..

حاول يدس في قلبو .. لكن ما قدر ..

وطوّالي .. ما كضّب خبر ..

في الدلتا .. شريانو انفجر ..

وقليبو قسمين إنفطر ..

وأفشاهو سرّنا .. للبحر ..

سرّنا في بير .. ما عارفو غيري ..

وغيرك إنتي .. وكم نفر ..

القمره ما عرفت تخبّي ..

سرّ الريد على النجمات ..

نحفت عديل .. وبقت هلال ..

وده كلّو .. من تعب السكات ..

نادت علي العصا .. والمعاها ..

وعلي التِريّا .. الفي علاها ..

حتّى النجوم البي وراها ..

وورّت نعش .. في العنقريب ..

وقبّال تفوت .. حجّت نعش أجمل بنات ..

والكون عرف .. وذاع اخبر ..

بس قولي خير .. حتّى لو شاع وانتشر ..

سرّنا في بير .. ما عارفو غيري ..

وغيرك إنتي .. وكم نفر ..

الحب حنان ..

لا بيأذي إنسان .. لا بيضر ..

الحب أمان ..

لا فيهو إشراك .. لا كُفر ..

ياربّي يا مالك الوجود ..

تقبل دعاي .. ولي تجود ..

تحفظ حبيبي الغالي ..

من عين الحسود ..

سرّنا في بير .. ما عارفو غيري ..

وغيرك إنتي .. وكم نفر ..

يا ليلى .. يا ستّ الحسان ..

أنا قلبي بعدِك .. إستكان ..

وعدّى مرحلة الخطر ..

يامنتهى الريد والحنان ..

يا أصدق كليمه على اللسان ..

يا حسّه ..

يا بكره .. وزمان ..

ممكن أقول أنا عن عيونك ..

وما أسكت .. إلا بعد شهر ..

وانا ما سكتّ عشان خلاص ..

أنا بقدر أوصف فيك عمُر ..

لكن عيونك توّهنّي ..

علّمن عيني السهر ..

وقلت أرتاح لي شويّه ..

وألزِّم القلم الصبُر ..

القلتو ليك أنا .. ما كتير ..

وما كفايه أكتب فيكي لو ..

1000000000 سطر .