بسأل نفسي طوالي.. ليه ياولد بتحب السودان ده كده؟.. والله العظيم مالقيت إجابه لحد حسه .. يمكن تربية العسكرية في البيت ؟.. أو عشان بنقول السلام الجمهوري في الطابور من صغار؟.. أو لمّن الهلال يغلب وأطلع الشارع بعلمي وأجري يمين وشمال.. ما عرفت والله . بقيت أراقب في الناس الحوالي عشان أعرف ليه هم بيحبوا السودان.. وطبعاً لقيت أي زول بسببو..وكل الناس دي بتحبو بشكل مختلف.. وبعد مراقبه طويله.. لقيت إنو كل السودانيين بيحبو السودان عشان السودانيين الفيهو.. سودان بلا سودانيين عباره عن سودان بس..نيل وبحر وغابات وصحراء.. طيب وين الناس؟... ممكن كان يعيشو غيرنا في السودان..بس ما حيقولوا عليهم سودانيين.. لأنو بلدنا دي مخلوقه عشاننا .. تعال شوف السوداني وهو في مطار بلد تاني.. عيونو ماشه وجايه في الناس..وأول ما عينو تقع على سوداني.. بيفرح بيهو زي كأنو زول تايه ليهو سنين ..وأخيراً وصل...وبنفس القدر...السوداني البره البلد دي لمن يشوف ولد بلدو...مافي وصف والله...لكن هي حاجه جوانا...وحاجه قيّمه كمان...إحتمال يتهمونا الناس بالتطرف في حب بلدنا...لكن أنا مالقيت تفسير.
قبل كم سنه كنت في المسرح القومي.. كان عرض مسرحية المهرج...وكالعاده قبل العرض بيبدأ السلام الجمهوري...في أثناء السلام الجمهوري في واحد قدامي ما وقف..وأنا صراحه خلااااااااااص..إتضايقت منو...قلت أصبر شوية عشان أي تصرف حيضحك فيني الناس...والزول كمان خالف رجلو وبيعاين ..كأنو الناس الواقفه دي ماعندها موضوع...أخيراً بعد ما أنتهى السلام الجمهوري...لقيت الناس بتتكلم..أو في الأصح قرايبو...إتضح في النهايه إنو ما عارف... قالوا أصلو شهاده عربيه.. وما عارف حاجه..عليكم الله ده عذر؟...أوريكم مثل عن الناس البيقولوا عليهم شهاده عربيه ديل؟...إتصلت علي أولاد عمي بره السودان...إتخيلوا بيعملوا في شنو؟...واقفين في السفارة السودانيه عشان يسجلوا أسماءهم للإنتخابات...ووالله العظيم..والله العظيم... واحد فيهم حفظ السلام الجمهوري السوداني وهو كبير
وزي ما قلت ليكم..مالقيت في النهايه حاجه ممكن تخلينا نحب السودان غير أهلو...السودانيين...من كترة ما بيحبوا السودان ..سموهو (عزه).. والإسم جاي من طبعنا الحامي ... بنخاف على أرضنا زي ما بنخاف على عرضنا...السودان...وجاي من حبنا وفخرنا بيهو...من غير ليه...أو عشان شنو بنحب السودان.
سوداننا عالي
نشيلو في عيوننا
ونحميهو بجنودنا
ده وصيه من جدودنا
لأنو غالي
سوداننا عالي
بنحبو من صغرنا
ومافي زول جبرنا
بنقضي فيو عمرنا
ده الديمه حالي
سوداننا عالي
نصونو بأمانه
نفديهو بدمانا
وما بنرضي ليو مهانه
ولي قلوبنا مالي
ده سوداننا عالي
وعلي قولكم (تصور كيف يكون الحال...لو ما كنت سوداني)
هناك تعليق واحد:
والله العظيم كل كلامك صح
السودان من غير اهلو م يبقى سودان
هو في و طن من غير ناس؟؟؟
بس م كل الناس واحد
و على قولهم (الناس اجناس)
والله سودانا مافي زيو
انت زي م عارف انا عشتا في بلد العرب كتير
اي نعم فيها راحه و نفسيات تكون فوق
و ترطيبه
بس دا كلووووووووووووو فايدتو شنو من غير الاهل و الاصحاب و الناس ي ولد الخاله
تسلم و يسلم لسانك
و انا دايما بقول غير سوداني م لي وطن تاني
زوبه
إرسال تعليق