من زمان

زمان قالوا مافي حاجه إسمها (الحاجه دي ضاعت ولقيناها)..لأ .. طالما لقيناها معناها كانت في مكان تاني بس..يعني بالعربي (ما ضاعت).. ومع زحمة الدنيا ..وإنشغال الناس بأكل العيش..نسينا إنو في حاجه ممكن تضيع مننا..وما نقدر نلقاها تاني... ده الزمن يا اخوانا...في حد يقدر يرجع ورا بي زمنو؟...يقدر يرجّع ضحكه أو فرحه أو لحظه سعيده؟...حتبقى ذكريات بس...أي نعم سعيده..أو حزينه...لكن ما بنقدر نعيش أحداثها تاني...والمصيبه الكبيره إنو زمان كان بتقدر تعيش حياتك في سعاده... بس إخترت النكد والحزن ...وماعارف إنو نفس الحاجه الإخترتها دي كان ممكن تحولها لسعاده..لأمل..عشان تبقى لقدام ذكرى جميله.

بتذكر حبوبه (الله يرحمها).. لمن ترسلني لحاجه عايزاها وأجيبها تقول لي...(تتبارك يا ولدي..ما تتشارك)...أو لمن تحكي لينا حكايات محمد أخو شولمنا... أو تاجوج والمحلق...وأنا بكون راقد على يدها...طبعاً القصه بعرف نهايتها تاني يوم...لأنو بكون نمت خلاص...وبتذكر لمن نجي من المدرسه ونسلم عليها...تقعد تحضن وتشم فينا واحد واحد...ما كان عندها واحد أعز من التاني...كلنا واحد عندها...دي بساطة الحبوبات يا أخوانا...وأنا كان ممكن ما أمشي المدرسه...عشان حبوبتي مدرسه ...حبوبتي علمتني كيف أزرع...كيف أبني...كيف أفرح بنتيجه إمتحانات ... وتقول لي (جيت لي يا ولدي)...حبوبه كانت بتختني ورا ضهرها لمن أجري عليها...بكون عملت حاجه..أو كسرت حاجه...تدافع عني عشان ما يدقوني......الله يرحمها حبوبه...إتعلمت القرايه من المصحف الشريف...براها...حبوبه ما كانت بترضى نقرا ليها..مش قلت ليكم مدرسه؟...ربنا يجمعنا في الجنه مع حبيبك المصطفى (عليه أفضل الصلاه والتسليم)...وكنتي دايما وإنتي بتخيطي في ملايه أو قميص..بتدندني بمدايح أولاد الماحي...لسه يا حبوبه ريحتك معاي...بتغطى ببطانيتك في أيام الشتا.

الوصيه..حاجه بتربطك بزول كان معاك...ووصاك على حاجه معينه..حاجه غاليه عليهو...والوصيه بتبقى مقدسه عندك..خاصه لو الزول ده بقى ما معاك...وبتبقى مقدسه أكتر لو الزول ده عزيز جداً جداً عليك...أي نعم هو بيوصيك على روحك..على نفسك..على حياتك...على عيونك... لكن برضو بتبقى وصيه من إنسان غالي...ومافي حاجه متحسر عليها أكتر من ردي على الوصيه دي..بس هزيت راسي بالموافقه..لأنو الظروف كانت مخلياني مركز في حاجه تانية..لحظه الوداع...وكنت أتمني الزمن يرجع بي وتتقال لي الوصيه من تاني...وأرد بالطريقه اللايقه..تليق بصاحب الوصيه...وتليق بالوصيه الغاليه علي كمان...لكن كيف؟؟؟...الزمن بيمشي...وصاحب الوصيه كمان مشى...من دنيانا كلها...وياريت كنت مكانو... أنا عن نفسي حأشيل الوصيه دي في راسي..وأموت بيها.

كان نفسي أقول ليك كلام كتيييير...وإنت معاي طبعاً ..وقتها ما كنت حاسي بالزمن وهو بيمشي مننا...وما بيرجع...لكن تاني توبه...حأقدّر كل لحظه معاك...وتعال ننسى الفات..لأنو ما بيرجع....ونبقى نعيش لبكره..احلى بكره....

تعالي معاي...

نمشي على طريق أحلامنا والآمال

ونبقى بعيد..

من السكك البقت مليانه بالبطّال

بقوا الأخوان يفارقوا بعض..

عشان الدنيا والأموال

وتلقي الزول بحب إتنين..

مناو للتالته يلقى مجال

,,,,,,,,

تعالي معاي..

نمشي من الزمن المعاند فينا..

إستني..

زمنا نعيبو ليه؟

ده نحن العليهو جنينا

زمنا ده ماشي بأعمالنا..

يوم ترفعنا..يوم ترمينا

أكيد يوم بكره يوم أحلى..

ده ربنا أصلو ماناسينا

,,,,,,,,

تعالي معاي..

نتوه في الريد...

نخلي دليلنا في المشوار

يسوقنا على أرض أحلامنا..

نبني هناك أحلى ديار

ونسرح بي عيوننا بعيد..

ونرجع بعمرنا صغار

نعيش طول العمر أحباب..

ولأطفالنا نبقى شعار..............

وعلي قولك يا حوته..

خلي بالك بين إيدي وقت أسالمك لمّا يازولتي البريدك..

أمسح من الزمن العداوه..وأقول..بريدك