فجأه

كلمة الشوق دي كلمه عجيبه...(أنا مشتاق ليك)...طيب بتحس بشنو لمن تشتاق؟...بألم...بنشوه...بفرح...بحزن....وللا كلهم مع بعض؟...إتضح إنو الشوق ده إحساس قائم بذاتو...والحافز البيخلي الشوق يظهر ما محدّد...ممكن تشوف منظر يذكرك بالزول الإنت مشتاق ليهو..أو تحس بأي حاجه من الأحاسيس القلتها دي ..وتتذكرو...ممكن تمشي محل كنتو بتمشوهو سوا....أو حتى تسمع أي كلام بيتقال...فيهو كلمه أو كلمتين سمعتها قبل كده منو..أو عنو...وحاجات كتيره تانيه ممكن تخلي الشوق يغلب على مشاعرك....والغريبه إنو الشوق بيتحكم فينا من كل نواحي حياتنا...في قلة الأكل...في النوم..في دموع العين...في فلتات اللسان...في المزاج المتقلب.

وإذا حاولنا نصنع مضاد للشوق...يعني ما نشتاق خالص...ما حيدينا فرصه....بقينا نقول (البعيد عن العين..بعيد عن البال)...وبرضو الشوق بيلقى مدخل...الدنيا دي صغيره....والحي بيلاقي...وكمان إذا حاولنا ما نسمع عنو خبر...تلقى شوقنا غلبنا....يعني معقوله ما حنلقى طريقه نشتاق؟...ده ياخي أي حرف من حروف إسمو بتسمعا في اليوم مليون مرّه....بتشتاق غصباً عنك...وخصوصاً إذا إنت بقيت تتحين الفرص..وتستنى تسمع عنو حاجه...طالما البعيد عن العين ممكن تسمع عنو..يبقى إتحلت....بس قارن بين الكلام البتسمعو عنو..أو بتسمعو منو...فرق كبير....البتسمعو منو ده ضمان...لكن البتسمعو عنو ده يمكن يكون شغل عوازل ساي...لا..ده أكيد..ودايرين يشوفو لهفتك عليهو...شوقك ليهو...وعذابك العايش فيهو.

كل الناس عندهم أخبارك...

إلا أنا..المشتاق لحنّك

مره قالوا عليك جايينا..

وجايب فرح الدنيا المنك

وانا بستناك وعيوني الهايمه..

رايحه وجايه..تفتش عنك

وشايل ليك في إيدي هديه..

ده قلبي العالم بيهو..أظنك

؛؛؛؛؛؛؛؛؛؛؛؛؛؛؛؛؛

لقيت أخبار الناس ماصادقه..

وأملي اتكسّر جمب القيف

وشوقي اختار يرتاح في عذابو..

والعين فصل بكاها خريف

ده حتى القلب الشايلو عشانك..

قال أمشي ..خلاص ما تقيف

وما تسمع من غيرو مجيهو..

إلا بس إنت حتعرف كيف؟

وعلي قولك يا حوته..طرّوني ليك.